«Том ағайдың лашығы» — америкалық құлиеленушілердің қатыгездігі мен әділетсіздігі жайында XIX ғасырда жазылған ең басты роман. Бұл кітап АҚШ-ты ғана емес, бүкіл Еуропаны дүр сілкіндірген; аболиционистердің әділетсіздікке қарсылығын ушықтырып, құлиеленуші Оңтүстікте халықтың қаһарлы ашу-ызасын туғызған.
XIX ғасырдағы халықаралық нөмірі бірінші бестселлер сатылымы жағынан тек Інжілге ғана жол берген, АҚШ-тағы алғашқы басылымы 300000 данамен жарық көрсе, Ұлыбританиядағы басылымы бір миллион данадан асқан.
Бұл кітап жазылғаннан бері қазір екі ғасырға жуық уақыт өтті, алайда бүгінгі оқырман да сол бұрынғы заман адамдарындай қара нәсілді, мейірімді де әділ Том ағайдың ауыр тағдырына жаны ашып, онымен бірге күйінеді; ақ пен қара нәсілдің қанынан жаралған хас сұлу Элиза мен оның батыл да қайсар жұбайы Джордждың кішкентай ұлы Гарридің құлдықтан құтылар жарқын болашағы үшін алыстағы Канадаға қашып кетпек болған әрекетінен көз жазбайды. Шиеленіскен оқиғалар тізбегі оқырманды қызықтыра жетелеп отырады...
Кітап көпшілік оқырманға арналған.